Xornadas, congresos, etc

A gastronomía do mar como valor engadido do turismo mariñeiro en Galicia. Seminario

O Centro Tecnolóxico do Mar acollerá o 10 de decembro o I Seminario “A Gastronomía do mar como valor engadido do turismo mariñeiro en Galicia”, un evento que permitirá coñecer as propostas de cociñeiros de prestixio para achegar o mar ao consumidor e as apostas do sector pesqueiro para innovar e diversificar os produtos pesqueiros.

O seminario, que dará comezo ás 9.30 horas e que finalizará as dúas da tarde cunha cata de paté de percebe, enmárcase dentro do proxecto Pesca-Turismo que está a levar a cabo o CETMAR en colaboración co Instituto de Estudos e Desenvolvemento de Galicia –IDEGA- da Universidade de Santiago. O devandito proxecto, financiado a través do Plan Galego de Investigación, Desenvolvemento e Innovación Tecnolóxica (INCITE), pretende a definición dun novo modelo turístico baseado no patrimonio cultural e gastronómico das vilas costeiras galegas.

Neste seminario participarán membros de confrarías, mariscadores, representantes de conserveiras, cociñeiros e periodistas, que porán en común experiencias e proxectos sobre as posibilidades da gastronomía como elemento do turismo mariñeiro en Galicia.

As prazas son limitadas e no programa poderedes ver con detalle as intervencións previstas e a forma de inscrición.

Patrimonio Marítimo, Identidade e Desenvolvemento. Foro de ideas sobre a posta en valor do patrimonio marítimo galego


Organizado pola Cátedra Fundación Caixa Galicia-Universidade de Vigo, o seminario Patrimonio marítimo, identidade e desenvolvemento. Foro de ideas sobre a posta en valor do patrimonio marítimo galego terá lugar o vindeiro xoves 27 de Novembro na Sala de Conferencias do Museo do Mar de Galicia a partir das 9:30h

O obxectivo principal das sesións que configuran este seminario é achegarnos ao patrimonio marítimo dende un enfoque multidisciplinar analizando os riscos e ameazas pero tamén as potencialidades e posibles sinerxias entre as actividades económicas e a conservación do mesmo. Ademais de deternos no caso galego, coñeceremos outras experiencias novedosas que contribúen a formar unha idea do importante papel que pode xogar o patrimonio marítimo no proceso cara un modelo de desenvolvemento sostible, presentándose, ademais, algúns instrumentos que axuden a tal fin.

As sesións que conforman a xornada, como se amosa no díptico adxunto, son as seguintes.

· Patrimonio Marítimo. Do patrimonio natural ao patrimonio cultural.
· Antropoloxía da pesca. Tradición, cultura e sociedade.
· Vellos e novos modelos de turismo no litoral. Ameazas e oportunidades
· Valoración económica, desenvolvemento e conservación do patrimonio.

O seminario está dirixido para todo aquel que teña interese en afondar no tema independentemente da súa formación e actividade profesional debido, fundamentalmente, ao carácter multidisciplinar do mesmo.

A coordenación corre a cargo de María Xosé Vázquez e Roi Durán do Departamento de Economía Aplicada da Universidade de Vigo

Seminario Internacional sobre Ordenación, Planificación e Xestión do Litoral: reflexións desde Galicia


Os días 17 e 18 de novembro a sede da Fundación Barrié na Coruña acollerá o Seminario Internacional sobre Ordenación, Planificación e Xestión do Litoral: reflexións desde Galicia, organizado polo Observatorio do Litoral da Universidade da Coruña.
Este seminario pretende promover a reflexión científica e técnica sobre seguridade marítima e medio ambiente e trasladar a Galicia un amplo debate aberto sobre como deseñar a "gobernanza do litoral" na comunidade; un debate que, coa orientación dalgúns dos mellores expertos nacionais e internacionais suscite a participación de todos aqueles sectores da sociedade que coas súas variadas actividades -sociais, económicas, ambientais, etc. - concurren sobre as zonas costeiras de Galicia.

Xornadas divulgativas sobre o papel da muller no sector pesqueiro e conserveiro

O vindeiro día 17 de outubro van ter lugar na sede de ANFACO, no Campus da Universidade de vigo, as Xornadas divulgativas sobre o papel da muller no sector pesqueiro e conserveiro. Están organizadas pola Fundación Cluster Conservación de Productos del Mar, coa financiación da Vicepresidencia da Xunta, e a colaboración de ANFACO.
Ficha de inscrición

Onde se vive o mar. Mostra de embarcacións tradicionais





Do 5 ao 12 de outubro está tendo lugar en Pedras Negras, O Grove, unha mostra de máis de 20 embarcacións tradicionais de Galicia e Portugal.
Está organizada polo C.N.San Vicente, a FGCMF, a Asociación Galega de Carpintería de Ribeira, e o Concello do Grove.
Os próximos actos son:
10 e 11 de outubro
I Xornadas de Traballo da Asociación Galega de Carpintería de Ribeira. "Un Mar de Madeira"
Do 4 ao 12 de outubro
Exposicións de Enrique Conde, Blanca Marcos e Roi Vázquez.

Esta Mostra é unha oportunidade de ver unha grande variedade de barcos, pero ademais poderedes ver tipoloxías que non se ven facilmente como a Esperanza Liberdade, gamela de Cabo de Cruz, ou o Canote do Fao, barco do norte de Portugal.

Coincide en datas coa Festa do Marisco, e o Concello do Grove disporá un servizo de autobús cada hora que una o recinto da Festa, o CIPES, e Pedras Negras.

III Xornada Técnica. A náutica como motor de desenvolvemento rexional

O vindeiro día 10 de outubro vai ter lugar a III Xornada Técnica "A náutica como motor de desenvolvemento rexional". Está organizada por AGAN e vai desenvolverse no Hotel Husa Bahía, en Vigo.
As xornadas pretenden ser un punto de encontro entre os diferentes intereses da náutica, públicos e privados, a nivel rexional e supra-rexional, có fin de establecer un diagnóstico das necesidades e aspiracións dos actores do desenvolvemento do sector Turismo Náutico, cara ás axudas que aparecen actualmente para o periodo 2007-2013.
Ese mesmo día vaise inaugurar unha exposición no R.C. Náutico de Vigo co tema Galegos e cataláns. 1758-2008 A industria do mar.

I Xornadas de construción naval en madeira: “Un mar de madeira”


AGALCARI, a Asociación Galega de Carpintería de Ribeira organiza os días 10 e 11 unhas xornadas sobre construción naval en madeira.
Van ter lugar nas instalacións do Club Náutico de San Vicente, en Pedras Negras, no Grove, no marco da Mostra de Embarcacións Onde se vive o mar.
Con estas xornadas preténdese iniciar a posta en valor deste tipo de construcións ante as xentes do mar e a sociedade en xeral e poñerlles de manifesto as calidades inherentes ás embarcacións de madeira.
Tamén pretende ser un foro de debate entre todos os axentes que interveñen nos procesos que están presentes na construción naval en madeira.
E por último, conseguir que as distintas administracións e institucións coñezan as liñas de traballo a seguir para a elaboración do regulamento de construción naval en madeira
O programa é moi atractivo e con participación de persoas con amplia e variada experiencia no mundo da construción naval.
Actualización: En Todogrove.com podedes ver fotografias, e un video das xornadas

Xuntanza Blogueira.


O vindeiro día 4 de outubro vai ter lugar no Club Náutico de San Vicente do Mar, no Grove, unha xuntanza de blogueiros relacionados co mundo do mar. A asistencia está aberta a calquera interesado, blogueiro ou non, e en principio consistirá nunha comida (12 euros, 6 os nenos) e posterior sobremesa onde compartir a experiencia, visións e pareceres sobre o mar no blogs.
Está coordinada pola nosa Amiga Atlántica, e colaboran a FGCMF e o C. N. San Vicente.
Máis información

Análise e perspectivas para o recoñecemento do valor patrimonial, preservación e uso das embarcacións tradicionais.


O vindeiro día 18 de setembro vai ter lugar no Museo do Mar de Galicia unha xornada técnica sobre Análise e perspectivas para o recoñecemento do valor patrimonial, preservación e uso das embarcacións tradicionais.
A xornada ten como obxectivo coñecer experiencias de recuperación e marcos lexislativos de aplicación ás embarcacións que permitan o recoñecemento patrimonial das mesmas, a súa conservación e restauración así como o seu mantemento a flote, quer como testemuñas históricas, quer como un xeito de perpetuar os saberes tradicionais.
Porén, a xornada se iniciará cunha serie de palestras divididas en paneis temáticos. O primeiro panel versará sobre o marco normativo de fundacións e asociacións e os incentivos fiscais contemplados na lei de mecenado, como base para fomentar o apoio privado ás embarcacións. No segundo panel se expoñerán experiencias de recuperación e mantemento de embarcacións, en operación e como museo. Finamente no terceiro panel se detallará a experiencia francesa no tocante a conservación do patrimonio marítimo.
Vaise contar con expertos de Portugal e Francia para ver o que se fai noutros paises.
Esta xornada continúa o traballo iniciado nas xornadas técnicas do VIII Encontro de Embarcacións Tradicionais de Galicia, organizadas, como a presente xornada, polo Museo do Mar e o Colegio Oficial de Ingenieros Navales y Oceánicos.
A asistencia é gratuita previa inscrición, para o que tendes o boletin en pdf, onde se amplía esta información.

Entre Ascón e Pescanova. Curso de verán


Do 21 ao 23 de xullo vai ter lugar en Moaña o curso de verán da Universidade de Santiago Entre Ascón e Pescanova. Construción naval, pesca de grande altura, e desenvolvemento da conxelación en Galicia.
O curso, dirixido por Xan Carmona e Jesús Giraldez, conta con destacados participantes, ademais dos directores daran conferencias Dionisio Pereira, Rosa Garcia-Orellan, Pedro Riobó, Alfonso Paz-Andrade, Luisa Muñoz Abeledo e Manuel P. Rúa.
O obxectivo do curso é retroalimentar a investigación que se está a levar adiante sobre a actividade da construción naval e a actividade industrial pesqueira no pasado século XX en Galicia, especialmente na ría de Vigo.

Distribuir contido