Está aberto o prazo de inscrición para participar no II Trofeo Capitán de corbeta Jaime Janer para barcos clásicos e de época. Gran Premio Concello de Marín. A regata terá lugar os vindeiros 7, 8 e 9 de xuño e está organizado polo Real Club de Mar de Aguete e a Escola Naval Militar de Marín, conta coa colaboración de AGABACE, o Club Náutico de San Vicente e o Monte Real Club de Yates de Baiona.

Para poder participar é preciso ter un certificado de rating JCH (que se pode obter gratuitamente), cumprir coa normativa particular de Agabace e seguir as instrucións do anuncio de regata e cubrir o boletín de inscrición.

O pasado 17 de maio na Festa das Letras botaronse ao mar catro dornas polbeiras na Illa, unha da Illa e tres do Grove. Como outros anos a ACD Dorna inicia ese día a súa tempada de navegación, e como outros anos é o día de botar ao mar ao son da Marcha do Antigo Reino de Galicia os barcos novos ou recuperados.

A Soiña é unha dorna de traballo que ía as centolas e que foi recuperada para a navegación de lecer. As outras tres dornas, a Calloa, a Caropa e a Lourdes, son novas. As tres feitas por carpinteiros do Grove para armadores do Grove.

A Calloa é unha dorna que vai dar moito que falar, porque mantendo as características básicas dunha dorna incorpora detalles totalmente novidosos no mundo das dornas polbeiras. Esperemos que participe no XI Encontro para que poida ser vista por todos. Parabéns ao seu armador e ao seu construtor porque sempre é bo que mantendo a esencia da tipoloxía se incorporen innovacións aos barcos, logo o tempo dirá se terán ou non continuidade.

E parabéns aos armadores das catro dornas porque inda que a dorna é un barco moi eficiente economicamente e dificilmente se pode facer un barco coas súas prestacións usando menos man de obra ou menos madeira, inda así ter unha dorna supón un forte compromiso co barco e estes catro armadores en tempos duros son quen de investir cartos e tempo e ilusión nestes barcos.

O vindeiro venres 17 de maio vai ter lugar na Illa a conmemoración do Día das Letras Galegas, e por tanto como outros anos a ACD Dorna comeza oficialmente a tempada de navegacións.

Ás 11:00 h no Cantiño vaise facer unha pequena homenaxe a Roberto Vidal Bolaño, o autor ao que se dedica este ano o Día das Letras Galegas, coa lectura por Carlos Blanco a bordo do Rei do Mar dun traballo de Vidal Bolaño publicado na revista Dorna. Actuará o grupo de Música e Baile da ACD Dorna. Haberá tamén a botadura de dúas dornas e para rematar a xornada farase unha navegación, coa que empezará oficialmente a tempada de navegación na Illa.

O pasado sábado 4 de maio reuníuse no Freixo o Comité Organizador do XI Encontro de Embarcacións Tradicionais de Galicia. Na xuntanza douse conta dos apoios das administracións xa confirmados. Neste momento hai comprometidos apoios económicos, de maior ou menor cuantía, da Consellería do Medio Rural e do Mar, Secretaría Xeral de Cultura, Turgalicia, Centro Galego de Artesanía, Concello de Outes, e Grupo de Acción Costeira 4. A Deputación da Coruña confirmou a súa vontade de colaborar pero por cuestións administrativas falla saber cal será a súa achega.

As comisións do Comité deron conta dos traballos feitos: a de navegación xa ten elaborado o plan de atraques e de balizamento, e está a preparar o material necesario para os fondeos. A de voluntariado xa dispón do compromiso de máis de 100 persoas de todas as idades e aptitudes para levar adiante o enorme traballo que supón un Encontro. A de cultura xa ten un borrador inicial de programa de actividades con algunhas xa confirmadas, pero estase á espera da achega da Deputación para formalizar outras. A de loxística en terra xa ten adiantado moito traballo no referido aos espazos que se van ocupar e estase elaborando o plan para a manutención dos participantes.

Presentouse ao Comité o traballo do pintor Alfonso Costa para a elaboración do cartel do Encontro, e que foi valorado moi positivamente polos asistentes. Anunciouse tamén que o web do Encontro está listo para facelo público, cousa que se fará nuns días.

As Xornadas Técnicas que se van adicar a Carpintería de Ribeira xa teñen o seu programa elaborado, e o mesmo se pode decir das actividades para conmemorar os 20 anos de Encontros. Á espera da impresión tamén está elaborado totalmente o número de Ardentía que se vai editar co gallo do Encontro.

Por último, o Grupo de Acción Costeira 4 Seo de Fisterra e ría Muros-Noia pasa a integrarse no Comité, e xa comprometeu unha considerable axuda ao Encontro que se concretará na edición de material publicitario, e sobre todo en organizar as actividades de promoción do marisqueo e gastronomía relacionada co mar da zona.

Dionísio Pereira acaba de abrir Na volta do camiño, un blog persoal. Dionísio é coñecido de todos os interesados no patrimonio marítimo e fluvial polo seu traballo neste campo, e entre outros moitos méritos ten o de ser o primeiro presidente da FGCMF.

O seu blog pretende ser por un lado un sitio no que ir recollendo toda a súa produción científica, non só a relacionada co mar senón tamén a notable investigación feita sobre a historia dos movementos sociais en Galicia ou a relacionada coa Terra de Montes, e por outro lado un espazo no que compartir as súas reflexións. Parabéns a Dionísio por esta iniciativa que vai facilitar a difusión dun traballo de moitos anos.

Acaba de facerse pública a nova versión do web de Amigos da Dorna de Portonovo.

Neste web atoparedes información sobre a asociación, a súa historia e os seus barcos, imaxes das súas actividades, a colección do seu boletín O Cabeso en formato pdf, etc. e xa ten activado o blog da dorna Habana, o barco dun dos socios.

Parabéns a Amigos da Dorna por esta iniciativa, porque como di o seu anuncio da nova web "...continuábamos sendo conscientes de que a web ten o valor engadido de ofrecer unha información accesible de xeito permanente para todos os interesados nas embarcacións tradicionais, que o alcance limitado e o carácter efímero das redes sociais non permite..."

Por desgraza son moitas as iniciativas que por estar circunscritas a unha determinada rede social non son vistas por xente que non pertenza a ela e tampouco polos buscadores como Google. Ademais este novo web fai uso de RSS polo que a partir de agora as novidades que nel se difundan aparecerán no noso apartado de Novas dos Colectivos.

Nestes días algúns dos nosos barcos, logo dos traballos invernais en terra van para o mar. A xeiteira Nova Marina, a dorna de tope Peza de rabo, ambas da ACD Dorna, e a dorna xeiteira Falucheira dos Mariñeiros de Bouzas son algúns destes barcos, pero hai moitas pequenas dornas, botes e gamelas que coa chegada de maio volven ao mar para empezar a tempada de navegación inda que o tempo no axuda moito esta fin de semana.
Na foto de arriba a Peza de rabo esperando para ir ao mar

O vindeiro 4 de maio vai ter lugar a II Volta a Tambo, con saída e chegada no Real Club de Mar de Aguete. Esta Volta está organizada polo Real Club de Mar de Aguete, AGABACE, Asociación de Pescadores de Aguete Chirleu, Grupo Cultural Ronsel e a FGCMF.

Para poder participar na Volta é preciso inscribirse previamente e o prazo remata o día 2 de maio. O programa contempla a confirmación das inscricións pola mañá e a saída da Volta ás 15:30 h e o seu remate ás 19:30 h e a entrega de premios ás 20:00 h.

Paralelamente á Volta terá lugar un concurso de fotografía relacionada coa Volta e a promoción das embarcacións tradicionais.

Os vindeiros días 31 de maio e 1 e 2 de xunho vai ter lugar en Esposende o V Encontro de Embarcações Tradicionais - Rio Cávado 2013 organizado pola Associação Forum Esposendense.

O programa é amplo, con navegacións, exposición de fotografías de Manuel Gardete, charla sobre as marcas de pescadores de Esposende, visitas aos Museos Marítimo e Municipal de Esposende, presentación do libro Fregateiros do Tejo, tertulia, e o Aniversário da Associação de Pescadores profissionais do concelho de Esposende.

Os tripulantes que decidan asistir co seu barco terán comidas e dormida por conta da organización, e a sempre magnífica acollida que os amigos portugueses dan aos asistentes aos seus eventos.

A data límite para inscribirse é o 5 de maio. Os interesados deben preencher esta folla de inscrición e enviala á associacao@forum-esposendense.pt acompañada dunha fotografía do barco en boa resolución.

Cada vez está máis preto a solución para o Estaleiro da Banda do río. Os técnicos do Concello de Bueu xa teñen listas as bases para o concurso de ideas e que probablemente serán aprobadas pola Xunta Local de Goberno o vindeiro venres.

(Vía Salvemos o estaleiro)