Segue o ciclo de música antiga no Museo do Mar, dentro do proxecto Espazos Sonoros. O vindeiro venres 9 de maio, ás 20:30, actuará o grupo Harmonia Artificiosa, con obras de Bach, Handel, e Telemann, e o sábado 10 de maio, á mesma hora, actuará o grupo Martin Codax, cun concerto sobre a música na Península Ibérica nos séculos XIV-XVI.

A equipa do Museo do Mar que leva adiante o proxecto A memoria do mar mantén un blog sobre o seu traballo.
Neste blog poderedes seguir a evolución do proxecto e ver unhas moi interesantes fotografías actuais sobre as zonas de costa visitadas, como a que vedes arriba, e que son as únicas prensas que actualmente salgan peixe en Galicia.

O proxecto A memoria do mar chega a Fisterra. Os técnicos do Museo do Mar estarán en Fisterra do 5 ao 8 de Maio en horario de 10:30 a 14:00 horas e 16 a 19:00 horas na confraría da localidade, a disposición das persoas interesadas.

Os Amigos da Dorna de Portonovo acaban de abrir sede en Internet, unha fermosa e completa web, con información sobre a asociación, as súas actividades, publicacións, e embarcacións. Ademais dispoñen dun album de fotos en Flickr con case 200 fotografías.
É unha moi boa noticia, sobre todo despois da anterior sobre a agresión á ENT, ver que o traballo de moitos anos é mostrado a todos, para que a xente o vexa e valore, e para que aprenda a respetar o patrimonio marítimo e o traballo realizado por colectivos como os Amigos da Dorna de Portonovo.

As fotos de arriba son dos furados feitos cunha machada, presumiblemente, nunhas dornas que pertencen á Escola de Navegación Tradicional da Illa de Arousa.
Este feito é de suma gravidade, polo feito en sí e polo que representa de atentado deliberado contra o patrimonio marítimo, e contra as persoas que traballan para que dure e permaneza.
A continuación transcribimos un comunicado feito polos presidentes da ACD Dorna e da FGCMF.

A ESCOLA DE NAVEGACIÓN TRADICIONAL SUFRE UNHA NOVA AGRESIÓN.

Este fin de semán, tres embarcacións das que a ACD. Dorna usa na praia do Bao, sufriron unha agresión consecuencia da cal taboas de tres de elas forón furadas presumiblemente con unha machada.
Este non é un feito aillado, xa se teñen rexistrado pequenas sustracións e a mais significativa fora o roubo de unha dorna. Cando toda a flota está inmersa nos preparativos dunha nova tempada, que este ano ten tamén como referencia a cidade francesa de Brest 08 e a salientable participación da ACD. Dorna, unha das asociaciacións mais activas da Federación Galega pola Cultura Maritima e Fluvial (FGCMF). Os destrozos ocasionados nas embarcacións, as únicas que estaban o aire libre, supoñen un baixón de moral e veñen a poñer de manifesto unha vella reivindicación da ACD. Dorna e da propia FGCMF.

Nos tempos do recoñecemento a nivel europeo da importancia da nosa cultura maritima e fluvial, convidados de honra en Brest08, convidados tamén a participar no European Maritime Heritage, que se desplaza a Vigo a finais de maio próximo, para compartir o seu congreso e coñecer mais de cerca un traballo e unha realidade que impresiona en toda Europa, a Escola de Navegación de Tradicional da Illa de Arousa, non ten un local onde traballar e non será porque non se teña pedido.
Ata hoxe as embarcacións da Escola da ACD. Dorna así como a de outras asociacións que tan importante labor no cultural e no deportivo, estan a desenvolver, deambulan ano tras ano buscando unha nave que algún particular cede desinteresadamente, e así vamos. Os que se arriscan a facelo nas “instalacións” o aire libre, o carón da praia onde está a asociación, acaban unha vez mais lamentando.

A primeira vez foi un remolque, logo xa viñeron pola dorna agora rompen as embarcacións. Dende a Escola e dende a propia FGCMF levamos anos poñendo de manifesto a situación de deficiencia en infraestructuras, que non soio nos impide medrar e facer o noso traballo desinteresado, senon que nos pon atrancos.
A precariedade do traballo das asociacións volve a quedar de manifesto, canto teremos que esperar a seguinte agresión? Cando por parte da Administración sexa cal sexa se darán facilidades para promocionar e conservar con dignidade o noso patrimonio maritimo e fluvial?

ACD. Dorna
Uxio Allo.

FGCMF.
Fernando Piñeiro.

Seguindo co ciclo Espazos sonoros, vai ter lugar mañán, mercores 30 de abril, ás 20:30 h no Museo do Mar, o concerto do GRUPO 1500 adicado á música do Renacemento co tema Amor e danza na Europa das nacións.

O proxecto A memoria do mar chega a Lira. Os técnicos do Museo do Mar estarán en Lira os días 28, 29 e 30 de Abril en horario de 10:30 a 14:00 horas e 16 a 19:00 horas no local da Confraría a disposición dos interesados.

Os amigos de Lajareu xa teñen o seu calendario de regatas de 2008 disponible no seu web.

A Delegación en Galicia de Colegio Oficial de Ingenieros Navales y Oceánicos, acaba de publicar o Dicionario Galego de Construción Naval.
Esta obra consta de perto de 2000 voces en galego, coa definición e tradución ao inglés, castelán e portugués.
É froito do traballo de varios especialistas en lingüistica e construción naval, que contaron coa colaboración de varios estaleiros de distintas zonas de Galicia.
Pode ser consultado directamente no web, ou baixado en pdf para o seu uso local. O seu interfaz web é elegante e potente permitindo facer procuras moi precisas.
Os autores agradecen que quen poida aporte máis voces ou máis información sobre as existentes para mellorar o dicionario, e para eso dispuxeron no web un formulario que permite colaborar na mellora do diccionario.
Esta é unha valiosa obra que nun futuro será moito mais valiosa, se cabe, coa axuda de todos nos.

Este domingo día 20 de maio, a partir das 20.30 horas, iníciase no Museo do Mar de Vigo o Ciclo "Outros Sons" do Festival "Espazos Sonoros" organizado pola Consellería de Cultura da Xunta de Galicia.
Para este primeiro concerto haberá un doble cartel cos grupos Vale Tudo (Lugo) e Barbez (EUA). A xoven formación galega é unha proposta musical próxima a improvisación instrumental, mentres, o grupo internacional Barbez sintetiza diversas músicas occidentais e ofrecerá un concerto-musical e poético adicado ao poeta xudeu rumano Paul Celan asasinado polos nazis.
Actualización: A este concerto seguiranlle outros no mesmo espazo dos que podedes ter máis información nesta nota de prensa