O vindeiro sábado, día 4 de setembro, vai ter lugar en Ribeira a Regata Lajareu, con saida desde a praia de Coroso ás 16:00, e que está organizada por Lajareu por Barlovento.

Os vindeiros 3, 4 e 5 de setembro vai ter lugar en Curuxeiras, en Ferrol, a XVIII Parrocheira, organizada polo Club do Mar de Ferrol e que este ano sirve de marco a unha Mostra de Embarcacións Tradicionais, en seco, que forma parte das actividades do Proxecto Dorna. Ademáis coincide co centenario da Autoridade Portuaria Ferrol-San Cibrao.
Segundo o programa haberá unha mostra de 20 barcos en terra, de diferentes tipoloxías para que a xente vexa como son as obras vivas e poida ver con detalle o interior. Tamén haberá unha exposición sobre o Centenario da Autoridade Portuaria, e actividades para os nenos, cunha piscina para navegación e obradoiros infantís.
Por suposto haberá navegación, taberna mariñeira e música ao remate do día. Os interesados en acudir co seu barco que por favor contacten coa Sección de Vela Tradicional do club do Mar indicando datos do barco e número de tripulantes.

O pasado domingo o Novo Sofía e Rabandeira tiveron unha avería volvendo de Aguiño, despois de participar en Pedras Negras na Regata de Clásicos. Quedaron sen motor e o vento non foi abondo para vencer a corrente que os levaba cara ao Faro do Sargo. Chamaron a Salvamento Marítimo, que lles dou remolque a Ribeira, e por sorte a tripulación non sufreu danos.

A noticia no Diario de Arousa

Nunha xornada espléndida de sol desenvolveuse este domingo a III Concentración de Barcos Clásicos Trofeo O Corte Inglés, organizada polo Club Náutico San Vicente do Mar en colaboración coa Asociación de Amigos da Dorna Meca.

O trazado do percorrido saíu do Porto de Pedras Negras e dirixiuse ao faro de Camouco na illa de Ons, para virar ata o Faro de Picamillo no que o vento foi moi escaso, cun máximo de 8 nós e con notables cambios de compoñente. A partir de alí e virando na baliza de Faxilda seguiuse cara a praia da Lanzada percorréndoa en paralelo, ofrecendo un magnífico espectáculo de plasticidade e beleza. O tramo final remataba no porto de San Vicente onde se deu a chegada ás embarcacións participantes. O número de barcos participantes ascendeu a 24 entre os que se contaban o Nocturne, Miña Miniña, Casandra, Silma, Airexa, ou o Evangelina Uno.

Este evento logrou reunir a un amplo abano de embarcacións clásicas de todo tipo, desde dornas senlleiras, pasando por clásicos de enxeñeiros de renome como Camper&Nicholson, barcos recuperados como os vellos galeóns de ría, veleiros con máis de 50 anos de historia, ata as novas construcións que manteñen liñas e materiais de tempos pasados.

A entrega de premios, que coincidiu coa entrega de diplomas aos alumnos da Escola de Vela do Club Náutico San Vicente, estivo presidida por Ulises Bértolo en representación do Club anfitrión, Pedro Blanco en representación do patrocinador El Corte Inglés e Guillermo Gefaell en representación da asociación Internacional de barcos clásicos Banjer 37 Motorsailer Club.

As embarcación premiadas foron:

-Sara O, de Xosé Avelino Ochoa, embarcación maior número de tripulantes da Escola de Vela do Club Náutico San Vicente.

-A dorna xeiteira Rabandeira, da Asociación Rabandeira de Vilanova de Arousa, como primeira clasificada na categoría de barcos de traballo.

-O Aguete, propiedade da Armada Española, como primeiro clasificado nos barcos Espírito de Tradición.

-O Gañador en barcos clásicos foi o Ébano, un vela lixeira da clase Snipe, construído en madeira laminada nos estaleiros Lago de Vigo en 1970, tripulado polos irmáns David e
Sonia Leiro.

-O premio ao barco máis fermoso por votación entre os participantes foi para o Naia ,e Pablo Blanco.

-O premio ao barco de Época foi a parar ao galeón Nuevo Sofía, da Asociación Rabandeira de Vilanova de Arousa.

Na foto de arriba vese a dorna de tope Airexa en regata, e por detrás dela o Naia. Máis fotos do evento en Todogrove.com

(Texto e foto Lino Prieto)

O vindeiro sábado 28 vai ter lugar a Regata do Bao, na Illa de Arousa, organizada pola ACD Dorna. A saida será ás 16:00 desde a praia do Bao.
Esta regata é a única que ten a súa saida desde terra e cos barcos sen aparellar, polo que é moi espectacular.
Actualización: no blog da ACD Dorna tendes unha crónica da Regata do Bao, coa clasificación dos participantes

Dada a coincidencia de datas coa Regata do Bao, unha vez que esta cambiou a súa data prevista, a Regata Mar do Bohido queda aprazada sine die

O vindeiro domingo 29 de agosto vai ter lugar en San Vicente do Mar a terceira Concentración de Barcos Clásicos, organizada polo Club Nautico San Vicente. A saida está prevista para as 11:30. O percorrido será desde San Vicente a Camouco, Picadillo, Lanzada e San Vicente. O sábado haberá xornada de portas abertas e cea para os participantes.

Os vindeiros días 27, 28 e 29 de agosto vai ter lugar o XIV Encontro de Embarcacións Tradicionais de Bueu, organizado por Os Galos, e coa colaboración de Bueu Turismo, Museo Massó, Cineclube Bueu e Confraría de Pescadores San Martiño.
Como outros anos o Encontro de Bueu coincide coa Festa do Polbo, que ademais da degustación de polbo, conta cun programa variado.

O programa do XIV Encontro tamén é amplo e variado, con charlas, cine, regatas e botadura dun tiknot.
A organización facilita aloxamento no Pavillón, e comida e cea o día 28.
Os interesados en acudir poden inscribirse gratuitamente no correo galosbueu@yahoo.es ou chamando ao 600 426 086 , indicando os datos do barco e número de tripulantes. É importante facelo o máis pronto posible para facilitar o traballo dos organizadores.

Con motivo do Encontro o Museo Massó organiza o día 28 rutas didacticas en barco pola zona, que incluen o seguimento da navegación das embarcacións tradicionais. As rutas serán a bordo do Chasula, de caracter gratuito, e as prazas son limitadas. É unha boa oportunidade para coñecer e desfrutar do mar de Bueu, e navegar entre as embarcacións tradicionais a bordo dun barco singular.

A FGCMF acaba de participar en Sail and Oar, en Millport, na illa escocesa de Cumbrae. O evento foi organizado por Galgael e Cumbrae Community Development Company, dentro das actividades do Proxecto Dorna en Escocia. Participaron no evento barcos de Escocia, Gales, Irlanda, Pais Vasco e Galicia, e houbo presencia de varios constructores navais escoceses.
A Federación desprazou ata Cumbrae catro barcos (dorna, dorna de tope, buceta e gamela), 6 persoas e material informativo (publicacións, folletos, etc.) Na mesma expedición tamén se transportou o material enviado pola Deputación de Coruña e a Consellería do Mar, socios ambos do Proxecto Dorna, e con presencia no evento.

O bo tempo que tivemos os dous días permitiu que os barcos navegasen sen problemas, sobre todo polas tardes, xa que polas mañáns o vento era frouxo. O pouco vento non afectou ao grande número de barcos escoceses de remo que tiveron oportunidade de bogar en óptimas condicións.
Foron moitas as persoas que se interesaron polos nosos barcos, e que fixeron preguntas sobre como se chamaban, construían, ou patroneaban. Os barcos estiveron fondeados polo que só se podían ver con detalle cando se achegaban a terra para embarcar xente, pero estiveron facendo largos continuamente fronte á praia para que a xente poidese aprecialos. A vela de relinga chamou a atención, sobre todo pola forma de facer a maniobra de virada.

En Cumbrae tamén estaban carpinteiros de ribeira galegos que estaban a visitar estaleiros escoceses dentro dos actos programados no proxecto Dorna, xunto con persoal do COAG, da Consellería do Mar e da Deputación da Coruña.

Dentro do evento presentáronse parte dos traballos do Proxecto Dorna: a base de datos para o inventario de embarcacións e estaleiros, a marca BATE, e as visitas a estaleiros de Galicia, Portugal, País Vasco e Escocia.

Foi unha boa experiencia para todos e esperamos que desta viaxe nazan lazos cos amigos escoceses e irlandeses que propicien intercambios de experiencias e novos encontros.

No blog da ACD Dorna tendes un resume do vivido pola nosa expedición, tamén hai un album de fotos de Francisco Vazquez Grandal, unha crónica do mesmo autor, e outras fotos no album deste sitio web.

Os Patexeiros organizan o vindeiro sábado 21 de agosto unha nova regata da copa Balbina en Sada. A saida será ás 17:00 horas e no seu blog hai unhas precisas indicacións sobre as normas a seguir para participar.