O Museo de Pontevedra ven de convocar unha nova edición do obradoiro Para ser grumete. O obradoiro comezará o vindeiro día 18 de marzo, as sesións serán todos os xoves durante 12 semanas, e como remate do obradoiro haberá unha sesión práctica de navegación cos barcos dos Galos de Bueu.
Os interesados poden conseguir máis información neste folleto.
Para darse unha idea de en que consiste este obradoiro podedes ver o Apupo 16 onde Jose Manuel Castaño, responsable do Gabinete Didáctico do Museo explica a experiencia.

Acaba de sair o novo volume da Revista de Estudos Miñoranos, correspondente aos números 7/8/9 e que entre outros inclue dous interesantes artigos: Intervención arqueolóxica subacuática, ampliación do peirao de porto de Baiona, Pontevedra de Miguel San Claudio Santa Cruz e Raúl González Gallero, e Notas etnohistóricas sobre o aproveitamento do argazo na costa suroeste de Pontevedra (de Silleiro ao Miño) de Roberto Rodríguez Álvarez.

No web da Federación Galega de Redeiras Artesás podedes ver a campaña de denuncia do intrusismo que están a levar adiante.
A existencia de moitas persoas que fan traballos de redeiras de forma non regulada está a supoñer o perigo de desaparición deste oficio como tal xa que o soldo medio non chega ao salario mínimo interprofesional.

Co gallo do Ano Xacobeo, Portos de Galicia acaba de iniciar o proxecto Portos Xacobeos.
Os portos que dalgunha forma están relacionados co camiño de Santiago van ser obxecto de especial atención, cunha sinalización específica,e neles terán lugar actividades como concertos, exposicións, conferencias, rutas, etc.
Xa está disponible a programación de actividades deste proxecto.

O Concello de Moaña vai intentar convertir duas carpinterias de ribeira sen actividade industrial en Museo da Carpintería de Ribeira.
Unha das instalacións é a que usa Sueste para os Campamentos de verán, e en principio o alcalde pretende integrar a asociación no proxecto de Museo.

Onte, xoves 25 de febreiro, o pleno do Concello do Grove aprobou por unanimidade a Moción de apoio á enmenda á «Ley General de Navegación Marítima».
No texto desta moción traballaron Antón Mascato, Concelleiro de Patrimonio, Dionisio Pereira, historiador, e Víctor Fernández, presidente da FGCMF.
Esperemos que o Concello do Grove abra o camiño a outros concellos e institucións no apoio á enmenda e na defensa do patrimonio marítimo.
Seguimos recollendo apoios.

(Foto TodoGrove.com)

A asociación Mar de San Ciprián vai construir unha réplica dun traiñón, cunha eslora de 10 metros. O carpinteiro que se encarga do proxecto é Francisco Fra, e está previsto que a construción se inicie en poucos meses, dado o apoio financeiro da Deputación de Lugo.
Esta é unha excelente noticia, porque está tipoloxía estaba desaparecida, e porque axudará a promover a recuperación doutras tipoloxías propias da costa norte.
(Vía Crónica3.com)

A Demarcación de Costas, dependente da Dirección General de Sostenibilidad de la Costa y del Mar (Ministerio de Medio Ambiente y Medio Rural y Marino) acaba de dar dous meses de prazo á Dirección Xeral de Patrimonio da Consellería de Cultura para que determine se o Estaleiro de Purro, en Bueu, é un ben inventariable ou merecente doutro tipo de protección. Caso de que pase o prazo e non sexa obxecto de protección será derrubado.

Membros da Xunta Directiva da FGCMF mantiveron o pasado venres unha reunión cos Galos de Bueu e coa directora do Museo Masso para recabar información sobre a situación do estaleiro e prantexar actuacións para lograr a protección desta instalación única en Galicia.
Parece que é necesario un último esforzo para salvar este estaleiro, que puido sobrevivir ata aquí polo traballo feito polos Galos nestes anos e que agora precisa o apoio de todos.

Cando noutras partes de España se laian de que xa non teñen carpinterías de ribeira, ou cando noutros sitios se asume a importancia deste tipo de instalacións, como en Malaga ou Pasaia, aquí ainda hai xente que só ve nelas ruinas. Por sorte tamén hai outros grupos, como Anduxía, que apoian a recuperación de Purro.

O pasado domingo o Diario de Pontevedra publicou unha reportaxe sobre o Club Mariño A Reiboa, de Poio.
E o Faro de Vigo publicou o luns pasado unha reportaxe sobre a actividade da FGMCF.