Cambados

Cambados, a capital do viño albariño, é tamén, desde sempre, unha vila mariñeira. Mellor dito Cambados está formada pola unión de tres vilas históricas : Cambados, Fefiñáns e San Tomé, todas elas cunha forte vinculación ás actividades produtivas do mar. Poñamos algúns someros exemplos: tanto os antigos señores de Cambados ( Casas de Monterrei e de Alba) coma os de Fefiñáns (Os Sarmiento de Valladares) explotaron ostreiras nas súas respectivas praias e que por elas litigaron entre si e contra outros .

A Vila de San Tomé naceu no illote de San Sadurniño, alí houbo castro, asentamento romano e vila medieval con “casa forte” (de Paio Gómez de Sotomaior) da que as ruínas da Torre de San Sadurniño constituén o principal monumento histórico e derradeiro vestixio. Os mariñeiros de Cambados e San Tomé obtiveron “privilexios” de diversos reis de Castela e os seus traballos e conflitos aparecen nos documentos do gremio de Mareantes do Corpo Santo de Pontevedra. No catastro do Marqués de Ensenada aparecen recollidos mariñeiros de diversas artes nos tres portos, ademais de lanchas de “revenir” para vender sardiña en Portugal.

Tamén, no mesmo documento, se reflicte unha actividade que tivo importancia histórica no mar de Cambados : o escabechado de ostras e o seu envasado en barricas de madeira. Como símbolo da complementariedade ou simbiose entre os traballos do mar e da terra existe en Cambados un dos poucos muíños de “mareas” de Galicia, hoxe rehabilitado e formando parte da Rede de Museos municipal.

A contorne no que se van desenvolver os encontros estará presidido en todo momento polos monumentos citados e polos cascos históricos construídos por mariñeiros e casas señoriais.

Desde unha perspectiva do asociacionismo do mar a importancia dos mariñeiros de Cambados é transcendental no ámbito galego e español. A primeira asociación moderna de pescadores fundouna, a finais do século XIX, en Cambados Alfredo Brañas. E aquí fundouse tamén o primeiro pósito do estado español, en 1917. Durante a guerra civil tivo sede en Cambados a Federación de Pósitos del Oeste Peninsular. Cecais por todo iso, foi en Cambados onde tivo a sede desde o seu nacemento a Federación Galega pola Cultura Marítima e Fluvial. Agardamos que toda esta experiencia sirva para a mellor organización destes Encontros.