O vindeiro 28 de abril ás 16:00 horas vai ter lugar no Museu de Ovar unha conferencia impartida por Alfredo Pinheiro Marques (historiador e director do CEMAR - Centro de Estudos do Mar) sobre o tema "O Barco do Mar dos Litorais da Ria de Aveiro: O Mais Belo Barco do Mundo".

Alfredo Pinheiro Marques é un profundo coñecedor do mar de Portugal e especialmente do relacionado cos Descobrimentos. Do "barco do mar" o CEMAR ten subido a youtube dous videos moi interesantes, un deles un fermoso excerto do filme "Mudar de Vida" de Paulo Rocha, de 1966 e que mostra como se bogaba neste barco cunha tripulación de máis de 40 homes. E o outro filmado por un equipo da National Geographic Society en 1967. A imaxe de arriba está tomada deste último.

(Vía Lancha Poveira)

O vindeiro venres 20 de Abril vai ter lugar no Museo Massó unha conferencia de Yago Abilleira sobre o patrimonio histórico sumerxido nos fondos submariños de Bueu.
Yago Abilleira Crespo é membro do Club de Buceo Ons e un investigador de Historia Naval. Publicou o libro "Los galeones de Vigo", sobre a Batalla de Rande, así como numerosos artigos acerca de naufraxios en toda Galicia. Asemesmo, colaborou como mergullador auxiliar nas campañas de Arqueoloxía Submarina de Cíes, Fisterra, Cangas, Estaca de Bares e a Mariña Lucense.

O vindeiro 14 de abril, vai ter lugar no Museu de Ovar ás 16:00 h. unha conferencia do investigador de arquitectura naval Eng. Senos da Fonseca sobre "Embarcações Que Tiveram Berço na Laguna". Co mesmo título recentemente publicouse un libro do mesmo autor, que recibiu o prémio "Almirante Sarmento Rodrigues".

(Vía Lancha Poveira)

Mañán, mércores 7 de decembro ás 19.00h na Casa do Mar en Corme, a Concellaría de Cultura do Concello de Ponteceso organiza unha conferencia sobre os barcos de cabotaxe do século XX a cargo de José Ramón Varela Cousillas, autor xunto con Eliseo Puñal do web Barcos antiguos de Corme.
Entrevista a Jose Ramón Varela na Voz de Galicia

Mañán 16 de setembro ás 20:30 h, vai ter lugar na Casa Forestal As Canteiras, en Noalla, unha charla sobre A pesca e o marisqueo na Galicia antiga: A Ría de Arousa hai 2000 anos impartida por Víctor Bejeda e Eduardo González, expertos en arqueomalacoloxía da Universidade de León. Esta charla forma parte da serie Charlas Lanzadeiras, organizadas polo equipo de excavación da Lanzada.

O vindeiro 22 de maio, vai ter lugar no Freixo a Xornada conmemorativa do Día Europeo do Mar Un mar de saberes.
Organizada pola Consellería do Mar, constará de tres conferencias a cargo de Victor Fernández, presidente da FGMCF, Gerardo Triñanes, presidente de Agalcari, e Jose Manuel Vázquez Lijó, historiador.
Ademáis haberá un recital poético, paseo por mar e visitas a dúas carpinterías.
A inscrición é gratuita e está aberta ata o 20 de maio.
Programa e folla de inscrición

O próximo día 14, terá lugar no Casal de Ferreiros do concello de Poio, unha conferencia sobre a importacia de preservar o patrimonio maritimo de galicia a cargo de Víctor Fernández, presidente da Federación Galega pola Cultura Marítima e Fluvial, está organizada polo Clube Mariño A Reiboa en colaboración co concello e ca FGCMF. Este acto coincide ca exposición de pintura mariñeira de Moncho Lastra que permanecera aberta ata o día 18 de maio.

Mañán 22 de marzo as 20:00 h darán comezo en Marín as IX Xornadas Blanco Freixeiro de Arqueoloxía, Arte e Historia e que terán como sede o Museo Manuel Torres e que están organizadas polo Concello de Marín.

A primeira das conferencias será Homes de Terranova. A pesca do bacallao, a cargo de Rosa Garcia Orellan. O martes Víctor Fernández González, presidente da FGCMF, falará sobre Patrimonio inmaterial do mar de Galiza. O mércores Xosé Lois Vilar Pedreira falará de Talasonimia. Os nomes do mar. O xoves Francisco Calo Lourido falará de As comunidades de pescadores. A súa ideosincrasia.

O venres proxectarase o documental Galegos universais e haberá unha homenaxe á xente do mar, e o sábado realizarase unha visita guiada por Lino Pazos Pérez á Illa de Tambo.

O vindeiro mércores 17 de marzo ás 20:00 h vai ter lugar en Bueu unha charla organizada polos Galos baixo o tema O patrimonio marítimo. ¿Por que conservalo? na que participarán representantes de Os Galos, Victor Fernández, presidente da FGCMF, e Covadonga López de Prado, directora do Museo Massó.
O obxectivo da charla é mostrar a necesidade de preservar o patrimonio e os rendementos de todo tipo que esta preservación retorna á sociedade, centrándose neste caso no estaleiro de Purro, que ainda está baixo ameaza de derrubamento.

Achegámosvos o texto da ponencia A pesca da balea na Galiza: unha visión de conxunto dende a Idade Media ate a Moratoria do ano 1986 que presentou Dionisio Pereira no seminario Baleação, memória e identidade – Uma perspectiva multicultural, que tivo lugar en Lajes do Pico, o pasado 24 de xullo.
Neste texto faise un repaso á historia da pesca da balea en Galicia e recolle unha bibliografía básica para quen queira saber máis.
A foto de arriba é o barco IBSA II, hoxe Southern Actor, que está no Sandefjord Museum, en Noruega. Este foi un dos últimos baleeiros que cazaron baleas en Galicia.